Lusei,Lusai cihin Tun Mizo kici uh
————————————————

1972 kum in Mizoram in UNION TERRITORY a ngah tawh kitawn in Central kumpi in Lai Autonomous, Mara Autonomous leh Chakma Autonomous-te pia uh hi. Lai i cihte pen ni dangin Pawi kici uh a, tun Lai cih tawh kigawm uh hi. Tua mah bangin Mara te zong, ni dangin Lakher kici uh a, tun Mara ah kigawm uh hi.

1986 kum in Mizoram in State ngah uh a, ahi zongin Mizoram Autonomous District 3te 1972 kuma kipan tuni ciang dong ki update kik nai lo hi.

Tua ahih manin hih district 3te pangkhawm in central kumpi ah Direct Funding ngen uh hi. Central kumpi zongin a enkai dingin CID tam veipi tak sawl uh hi. Ahi zongin Mizoram kumpi in Direct Funding pen khak theih khak mawh in khaktan lai phawt uh hi.

Manipur hong buai ciangin zosuante in Union Territory with Legislative ngen mah leh Territorial Council a piak ding upmawh huai zaw pian a, hi tawh kitawn in India gam Northeastern a om mualtungmi khempeuhte dinmun zong update sawm in hun sawtpi a kipan in central kumpi in pan la uh hi.

Manipur gama zosuante ngah bangbang Mizoram Autonomous District 3te in zong ngah thei dingin kilamet uh hi. Central kumpi in zong district 3te update hunta hi ciin mizo kumpi tam veipi tak genpih khin uh hi.

Manipur leh Mizoram bek hi loin Assam gam sunga Tribalte dinmun zong, manipur tawh kitawn in, a lompi in update sawm uh hi.

Tua pen Central kumpi geelna hi a, ahi zongin amau deihna bangin a pai thei diam cih bel genkholh theih om nai lo a, Manipur ding munah kingah mahmah lai phawt hi.

Meitei tawh buai hong veng phial mah leh, manipur zosuan teng zong, ei kawlgam mah bangin hong kisingsat kik thei uh diam cih zong a ngaihsuthuaipi khat hi lai phawt a, zosuante mai lam ding sah mahmah lai hi.

ZBCnews#Conrrespondent#Zonupa