ZOGAM CHARTER SUNGTHU THEIH HUAI HI
———————————————————————

Malaysia gam KL khuapi ah kum2019 kum in Zogam Charter leh ZPCC/ZRAEC hong pian khiat nadingin makai khempeuh kim takin kihel uh hi. Tu’ ni a Zogam Charter langpang in Zomi Movement hong langpang khempeuh zong tua hunin Khawmpi-ah kihel mi vive ahi uh hi. Khut laamin thukimna vekpi ki neih khit ciangin Zomi te’ mailam ding thu khempeuh hi bangin kikal suan to ding cihna thu Zogam Charter kibawl khia ta hi.

Zogam Charter apian theih nading hun leh vai tampi gelna a om khit ciangin Zomi te’ tupna Zogam leitangh ah thuneihna i luah zawh nading Pasian hong thukimoihna tawh Zomi Khawmpi International pen kum2019 in Chin State leh leitung mun tuamtuam panin kikai khawmin lawhcing takin Zomi Khawmpi khatveina ki nei ta hi. Tu’ hun Burma gam SAC နွေဦးတော်လှန်ရေး spring revolution hunte hangin gam sungah siksan neilo, thang paihna bulphuhin Min Aung Hliang bek ngimna tawh Zomi sungah zong khangno tampi kipia uh a, tampi mah sihna a tuak khin zong ki om hi.

Zogam Charter tawh kalsuan ZPCC/ZRAEC in tu ni ciang apaipih pen Thumeilet leh policy tawh kipai ahih manin pawl khatin hawm thawhna leh langpanna tawh Zomi Movement nasepna gensia thei mawk uh ci hi. Hih bangin Zogam Charter hong pian theih nading political sem khinsa makai te kum35 bang minam leh gam ading ngaihsutna tampi leh tuahsa thu tetawh a hoih pen dingin Zogam Charter bawl khia uh a, makai thupi teng mahin kipsakna thupi tak anei uh ahi hi. Zogam Charter bangin kalsuanna pen Zomi Movement man takin apom leh akip semsem nadingin tu’ ni-in na sep ki zom toto khin ci uh hi.

Mimal khat deihna leh mimal khat thu bangin nasepna om ngeilo ahih manin tu’ hun nasep ciangin thukimna letmat khutlam kikai tangtang ahi hi. Zogam Charter zong makai Zomi Movement kip takin apom tengin hih pen zuih ding leh hih Zogam Charter tawh Zomi Movement kalsuan ding hoih hi, a cih khit ciangin khutlam kaih, letmat a thukhit tak teh kipin ki zang thei pan ahi hi. Hih thukimna te kuamah phel thei loin akip ahi hi. Zogam Charter leh ZPCC/ZRAEC thukimna khempeuh deih bang kei hi, kicing kei hi, cihna leh laihnop thu aom leh a ngei bangin Zomi Khawmpi sap ngai ding maw, kua in thuneihna tawh phuah ding vaisai theih hiam cih thu theih huai ahi hi.

USA gamah ZIUSA in Zomi Movement pen kum2016 in thukimna leh sep ding maban khempeuh agelna sa bangin mawh puak nei-in kum2019 ciangin Zomi Khawmpi leitungbup hong kaikhawm zo uh ahi hi. Tu’ hun in kum2021 hun ciangin နွေဦးတော်လှန်ရေး SAC in ukna hong lak kik ciangin pawl khat te kumpi bulphuh, pawlkhat te party bulphuh, pawlkhat te SAC bulphuh, pawlkhat te pau leh omna zui-in minam kisa thautawi, pawlkhat ten metna dingin minam sungah na sem uh ahi hi. SAC tungah thangpaihna နွေဦးတော်လှန်ရေး pen bei lam hita hi. China sen kumpi-in SAC tungah hong kimawl pih ahih manin kum70 huam sungah SAC kumpi in communist hong belh laisiah democracy haksa mahmah lai ding hi.

Zomi te phengtai gawp loin Zogam Charter thutawh kalsuanna hong makaih ZPCC/ZRAEC tungah nungzuih siam in, Zogam kuamah khut sungah piak theih zong hilo, Zomi te gam ahih manin Zomi mahin kembit in han ciamna kipaipai ahi hi. Kipawlna leh minam ading kon tawi gawp loin siksan thumeilet tak tawh kalsuan minam makai khempeuh thu dongin kal suan ding bek thupi hi. Zogam Charter tawh kalsuanna ah ngaklah kei ni’ na khempeuh Pasian in hong makaih toto hi. An zong amin ki ngak phot hi, gilkial luatmanin ki ne pah sam lo hi.

Zogam Charter ma suanna leh Zomi Movement lungtup thute khat zong pelem loin gual zawhna i ngah ma tengin Zogam Myanmar ah Zomi te’ minam leh gam ading nasepna kikhawl san thei lo ding uh hi. Zomi cih hong lang zong tam semsem ding, mi nautang leh thu ki theih sak khengkhat in minam langpangin hong zuak ding uh hi. Zomi ka hi, i cih leh minam pangpang leh hih Zogam Charter tawh kalsuan ZPCC/ZRAEC langpang peuh mah Zomi Movement apom hi loin mimal deihna tawh apai nam te uh ahi hi.

Zogam Charter
Zomi Political Coordination Committee ZPCC/ZRAEC
Zomi Revolutionary Army Eastern Command

Chin State sungah Zomi te’ ading minam nasem te leh gam ading kipia khempeuh in Pasian hong piak hih kipawlna sim loh min ngeih om tuan lo uh hi. Chin State sungah Zomi te’ gal lian penin CNA ahi hi, CNA bang hangin ZRAEC kap dek uh hiam cih pen Zogam Charter hong phuk nuam ahih manin hi. Zogam Charter bangin Zogam ah Ukna kumpi hong kilam ding pen CNA hih na sa mahmah uh hi. Chin State Zogam Charter kibawl khia masa pen ahihna hangin CNA leh apawl tengin Zogam Charter laibu hawm khia dingin apua Pu Kim Tuang hong suamlup sak pah uh hi.

Gam khat leh suahtakna thute a kilam ding ciangin sihna leh suamlupna in hong neh masa hi. Zomi te zong tua bangin Zogam Charter thutangko hangin Pu Kim Tuang sihna thuak ahi hi. Mailam ah Zogam kilam nadingin kim leh pam panin CNA leh pawl khatin hong do lai dingin uh hi. Tua khempeuh dalin i do khit ciangin Zogam Charter in a sungah thute hong kiphut to hiaihiai ta ding hi. Zogam Charter tawh Zogam kilam nading ZPCC/ZRAEC in lapi nuam tawn thei nailo ahih manin mipi tawh lam nuam kisial khawm ahi hi. Zomi te in kuamah gal ki deih lo, Zogam Charter tawh kalsuanna ah lampi hong khak khempeuh lam khangah paih ding uh ahi hi.

Zogam Charter
ZPCC/ZRAEC, Myanmar

ZBCnews#Conrrespondent#Zogam Charter#KL2019Zomi Khawmpi Intr’l