A VANG KIAM THEILO
ZRO/A
ZNC/ZCD
ZPCC/ZRAEC
Zomi khempeuh kipawlna sungah A VANG KIAM THEILO cih thulu tawh kipawlna minam hong makaih tengthu a tom in I gen nuam hi. Pasian in hong phungvuhsak in ZRO/A, ZNC/ZCD, ZPCC/ZRAEC hih kipawlna phungpi namthum thu tu’hun khangthak hun ah theih huai ding thu tampi om kha ding a, ahi zongin a tom in i gen nop thupha diakin A VANG KIAM THEI LO ahihna thu leh hong makai te thupi-in Pasian in Zomi te’ adingin hong seh sak te uh cih adiak in general nuam hi. ZOMI NAM hong makai teng sungah hong dampih lai zong om in hong nusia khin zong om ding khin hi, tu’ ni ciang dongah hih kipawlna a phut a kipan Pasian bek mah bulphuh kawmin kipan khia ahih mah bangin a piangsak leh hi ciang a kalsuan pih Topa Zeisu in makai te’ cih takna tungtawn in om pih in Chin State Burma gam sungah nam dangte’ nengniam theih loh zahin ciang kithei-in kum sawmthum tawm pen ciangin minam hong kikip sak uh a hi hi.
ZRO/A thu i gen nop diak in a masa in Zomi te adingin minam galkap dingin hong kipan khia in galte zong tampi mah Zogam panin nawk khia khin uh a, Zomi salpha tampi takin sisan leh nuntakna tampi mah tawh Zogam hong phut khia khin uh hi. Hih bangin Zomi te minam lung muan nadingin ZRO/A pen nam dang lakah zong kithei pha pen a, Zomi sungah zong langpanna tampi om mah leh hih kipawlna pawlpi ahih leh makai ten Pasian bek mah na zahtakin na bulphuh ahih manin A Vang Kiam Theilo minam phungpi hongkem hong huai dingin tu’ ciangin minam picing i suah theih nading kip semsem ahi hi. Zomi hihna kitel ciat makai leh thuneihna te deihna hangin makai gensia, kipawlna minam galkap langpang,nam dangte’ sim mawhna cih bangin ki thuak khin in makai te’ lungsim sungah Pasian puak zawhna leh makai din mun taktak ading Pasian koih ahihna kum sawmthum sung bang a dinpih asihpih dingin ZRO/O pen A VANG KIAM THEILO tha hat semsem hi cih, i gen nuam hi.
ZNC/ZCD cih pen kum sawtpi tak makai te’n Pasian mah bulphuh in Zomi te’ deihna suahtakna taktak Zomi te in i gamah vaihawmna din mun i neih nadingin Pasian tungah lungdam ko-in thugentna tawh kipan khia ahi hi. Zomi te minam gamvai kipawlna ZNC/ZCD pen kum sawmthum huam sungah lut ding ahih manin tu’ ni ciangin a tupna taktak tung zo nai kei mah leh A VANG KIAM THEILO ahihna leh thuman in sihpih ngam in minam makai dingin hong makaih te mahmah nuntakna Pasian bek mah a mitsuan leh a nuntakpih Zomi te’ muan leh suante ahihna thute i gen nuam hi. Panglong thukimna pen suahtakna Zomi te in zong ngah nading in kihel te ahih mah bangin hih hun lai pekin tu’ni a SAC in ukna alak kik ciangin kitom khangthak te deihna pen hua hun lai pekin ki nei khin sa thu ahi hi. Burma gam sungah Kawlte pen thuman ding hi leh panglong thukimna hun lai-in thukimna te kizang thei pah ding ahi hi. ZNC/ZCD cih pen Burma gamsung leh gamdang panin Hogn theih pih lo kuamah om lo ahih manin makai te pen thuman bek tawh lungtupna laikung laidal tawh thuman a kalsuan pih te ahih manin hih Zomi te minam gamvai kipawlna ZNC/ZCD pen A VANG KIAM THEILO hi, cih pen Zomi sungah mipi muhna leh theih cianna te tungah Pasian mah in tu’ ni ciang minam nasem khempeuh lakah zah tak ciing pen leh mi muan huai pen in hong theih te uh ahi hi.
Zomi Political Coordination Council ZPCC/ZRAEC pen Zomi sungah kalsuan zia theih kim nadingin tawl khat sung kilang khia nailo ahih manin hong kilak khiat ciangin kikal suanpih in kizang pah ahi hi. A VANG KIAM THEILO cih thu bek mah tawh minam sungah hong kilang khia ahih manin tu’ ni ciangin hong thupi semsem din munah hong kalsuan uh a, abei kum 2019 hun lai-in hong piangkhia ZPCC pen Zomi Khawmpi panin hong kilam khiat Pasian min tawh kipan khia, Pasian nasem tampi kihel in, minam makai leh a gamgam leh kipawlna kim tek panin hong po khia Zomi te’ phungpi hong suak ta hi. Kum 2021 khit lam ciangin hong ki thei khia semsem hi, a hangin Zomi te in bangin ZPCC/ZRAEC hong kithei khia in hong min ngaih semsem hiam cih thu atel lo ki om hi. Zomi Khawmpi Malaysia ah kum2019 in kineihna panin khawmpi thukimna leh maban khempeuh dam takin kisem ahih manin Zomi sungah hong ki theih khiat deuh hun pen SAC in ukna hong lakkik ciangin kitel pha semsem ahi hi. SAC in NLD ukna hong lakkik hun mapek in ZPCC in Zogam Charter Zogam Thu Tangko hong hawm khia in tuathu te kipsakna om khit ciangin a thuk zaw deuh in Khawmpi maban khempeuh kisem ziahziah hong suak hi.
ZPCC/ZRAEC in tu’ni a Zomi te minam leh gam sung buaina thute ah kumkhat kum nih sungah sem pak namte ahih loh manin apai dan leh kalsuan danin thuman bek mah siksan in thuleh laikung laidal bek mah tawh Zomi te i khantoh theih nading in hanciam in nasem uh ahi hi. Zogam Charter tungtawn in hong kalsuan pih minam makai tu’lai takin Zomi Political Coordination Committee pen hun khop khat kikal suanpih a, hong Lian semsem in Zomi Political Coordination Council ciangah kilam to in Zogam Myanmar adingin nasem khia uh hi. Bangbang in ki langpang in kigen sia in mimal ko’ na leh mimal thuneih nopna ziak nam tuamtuam te hangin ZPCC/ZRAEC hong kinawk mah leh A VANG KIAM THEILO ahihna thu Zomi sungah ngaih nopin zak nop semsem zaw hi. Nam dangte in hong nuai siah nop manin lam tuamtuam tawh hong langpan mah leh makai te leh nungthuap te thangah zaw sopin minam itna hong lian sak semsem zaw a, Zogam Charter tawn siksan in ZPCC/ZRAEC pen thupi kisa mahmah hi. Bang hangin ZPCC/EC hong puksak nuam tampi om hiam cih leh A VANG KIAM THEILO ahih manin ziak hi Malaysia gamah Pasian nasem siate leh minam makai tengin ahun lian laitak in thuman leh lungsim siangtak tawh kipsak in a nungta Topa Zeisu maiah thungetna tawh ki-ap ahih manin thupi kisa semsem ahi hi.
ZOMI dialkhai’ thu tawmno gen beh nuam hi, Zomite’ Dialkhai-in et lawm kisa semsem hi. A thei ngeilo mi dang khatpeuh in zong etlawm leh ngaih bangsa lel ahih manin Zomite’ Dialkhai-in A VANG KIAM THEILO aman neihna leh thupi kisakna hong khang sak semsem ahih manin itna hong gawm tuah mahmah hi. Zomite’ Dialkhai – in minam makai teng, Pasian nasem teng tawh Pasian maiah hoih hi, Zomi nambup zat dingin thukimna nei-in Pasian tungah ki-ap Zomi Dialkhai ahih manin langpang in nialin i om khak leh Pasian a dodo na hi ding hi,cih thu kiphawk sak nuam hi. Zomi ah apom lo khatin Zomi na langpan leh a bawl Pasian a thatthat na hih lam kitel cian mahmah ding kisam hi, Zomi hing a kicii ten namdang te’ tungah buaina i bawl kei ding a, nam dang khat peuh leh Zomi veve khatin hong leh pan leh hamsiatna thuak ding mite hi,ci-in koih lel ding kisam pen hi. Zomi Dialkhat Flag in koikoi panin kilang khia in kilam to a, kikhai sangin A VANG KIAM THEILO minam minpua PASIAN tungah ki-ap ahi hi. Spring revolution sungah mipi thukimna tawh kalsuan pen Zomi Political Coordination Committee ZPCC bek ahi hi.
A VANG KIAM THEILO cih thulu tawh hih Zomite kipawlna thute i gen ciangin min tuam tek hi mahleh Zomi ading mapang tengin gui kizom diimdiam takin hong makaih kipawlna te ahi uh hi. Zomi te kikhen theilo, nam dangten thu tuamtuam leh nam tuamtuam tawh hong gen zongin phamawh lo Zomi hihna pom kip peuh leng kuamah in hong nawk sia zo ding hipeuh mah lo hi. Zomi sungah Judah bangin sisan pih hihna hong langpang mi khat peuh a mawhna thu in amah khen ding ahih manin minam sungah bangin zatna ding omlo te ahi hi. Zomi khempeuh in minam kipawlna phungpi teng i genna hangin A VANG KIAM THEILO cih pen Pasian gelna leh deihsakna hangin I makai te zong ci dam leh nasep lungkia loin Zomi a sihpih ding te uh a hi hi. Khasum tawh kivak in minam nasem te hilo a, Moses bangin Pasian in hong vak inteh ka sih dongin Zomi te minam khatin nong bawl mah bangin Zomi te tualsuak thuneihna ka ngah mateng Topa tungah ki-ap in Zeisu mintawh nasem A VANG KIAM THEILO te uh cih i tangko khia hi.
ZOMI khempeuh din mun Pasian in hong lamto semsem ding a, minam makai leh minam kipawlna sungah Zogam ading hih A VANG KIAM THEILO i cih kipawlna sungah i nuntakna lungsim te gawm khawm semsem leng Zomi te deihna hong nithak hong suak ding ahi hi. ZOGAM CHARTER siksan ZPCC/EC in khawmpi maban khempeuh I sepna ah mipi mapang khawmin han ciam ni’ nungzuihna leh makaihna picing takin lam ton khawm siamte I suak ta ding hi.
ZBC NEWS 
Leave a comment