ZOMI MOVEMENT THUBULPI HILHCIANNA
—————————————————————
(Zomi khatin Zomi nam ading a sep leh)
2019 kum, Zomi Nam Ni hun sungin, Malaysia gam, Kuala Lumpur khuapi ah, Leitung muntuam gamtuam panin, akikaikhawm Zomi Makaite in, Leitungbup Zomi-te Minam Khawmpi (Zomi International Conference – ZIC2019KL) lawhcing takin bawlzo uhhi. Tua Khawmpi sung ah, gam leh minam thu tawh kisai Khawmpi Thukimna naneizo uhhi. Khawmpi Thukimna sung ah, Zogam ah Zomi-te in, eima thu eima’n vaihawm theihna, minam thuneihna bukim (Self Determination) angah theihna ding, Zogam leh Zomi Innpi phuh zawhna ding lunggulhna thu limtak in kipulak hi.
Hih lunggulhna atangtun theihna dingin hanciamna pen, Zomi Innkuan USA (ZIUSA) kipawlna in 2016 kum a kibawl, a Kumcin Khawmpi sung pan kipsakna leh taangkona abawl uh, Zomi Movement acih Thubulpi tawh akibang ahi hi. ZIC2019KL Khawmpi kipsakna bangin, tua lunggulhna atangtun theihna dingin, Pawlpi tuamtuam, Kipawlna tuamtuam, Party tuamtuam in, a dinmunciat panun, gam leh minam maban ah pankhop dingin kithukimna kineizo hi. Lam khat panin, Khawmpi akah minam thautawi kipawlnate, mun tuamtuam a minam kipawlnate, khua leh tui kipawlnate, Minam Party-te leh Zomi mipil misiamte in, Zomi Movement alawhcin theihna dingin ma pankhop dingin kithukimna akinei ahi hi.
ZIC2019KL KHAWMPI THUKIMNA PAN ZPCC PAWLPI MABAN
——————————————————————-
2021 kum, February kha sungin, Kawl (Myanmar) Galkap Kumpi in Myanmar Gam ki-ukna abuluh ciangin, Zomi Movement maban ah ma apang, ZIC2019KL Khawmpi amakaih, kipawlna tuamtuam pan makaite in, Zogam Maban leh Zomi Movement dinmun tawh kisai kikupna, holimna kinei hi. Myanmar Galkap Kumpi deihlohna tawh langpanna pen lungphona panin khauh semsem in thautawi a langpanna (Spring Revolution)
hong kibawl ahih manin, ZIC2019KL Khawmpi thukimna atangtun theihna ding hunpha hong suak hi. Ukna buluh Galkap Kumpite gitlohna leh thautawi a langpanna kikaal ah, thu leh la vaihawmna pen lauhuai mahmah ahih hangin, hangsan takin Zomi Movement maban kikupna kizom thei hi. Myanmar Spring Revolution tawh
kiton in, Zomi Movement maban azom ding Pawlpi khat phuh ding vai kithuminna kingah hi.
Zomi Movement maban ah madawk in ma apang dingin, ZIUSA Kipawlna in Zomi Democratic Front (ZDF) Pawlpi khat phutin, Zomi Defense Force (ZDF) – Zogam Galkap khat dinkhiat ding thu sung hi. Zomi Re-unification Organization (ZRO) leh ZRA(Eastern Command) Zogam Galkapte in, ZDF Pawlpi min sangin, Zomi Political Coordination Committee (ZPCC) khat lamin, suah lam Zogam sung alutkhin ZRA(Eastern Command) Zogam Galkapte tawh khut kilen a, Zomi Movement maban kalsuan ding thu sung hi. ZRO Pawlpi
thusunna leh ZIUSA Kipawlna thusunnate gawmtuah in, ZPCC Pawlpi khat atangzai zawin kiphutkhia hi. ZRO Pawlpi in aseh kivaipuakzia behlap in, ZPCC Pawlpi Makaipi Pawl apawlcing zaw khat kiphut hi.
ZPCC Pawlpi in, Myanmar Spring Revolution tawh kiton in, Zomi Movement atangtun zawhna dingin,
Zogam Charter khungin, Zomi Movement maban ah madawk in ma kipang hi. Zogam Charter siksan in ZPCC Pawlpi Kivaipuakzia limtak in kilam hi. ZPCC Pawlpi Kivaipuakzia sung ah, ZIC2019KL Khawmpi Thukimna sung a kikhung bangin, ZRA(Eastern Command) pen Zogam Galkap (Defense Department) dinmun tawh mapang dingin kiphungvuh a, Zogam bitna (Security) ding leh Zogam hu/dal (Defense) dingin mawhpuak kipia hi.
ZBC NEWS 
Leave a comment