AI-IN NASEM DING

———————————————-

(Zomi Language Trilingual)

Zomi AI siamte nasepin hunlap toto ding hi

Zomi Language Trilingual Mikang pau panin Zomi pau ah, Zomi pau panin Mikang pau-ah cih bangin zat ziahziah theih nading hong sem khia hanciam in abawl tawntungah lungdam huai mahmah ahi hi. Sia Disciple Kap Sian in ama hong han ciamna hangin Zomite minam lian khat hihna zahin Computer hun leh AI hunah Zomi pau panin mikang pau ah kingah sak thei ta hi. Zomi te koikoi ah na om phial zongin AI in na theih loh kammal laileh pau namte Zomi Language Trilingual panin mai lam uh ah tampi hong huh mahmah dingin ki lamen beh in kingah thei ding din mun hita hi.

Zomi sungah pilna nei tampi ki om khin a, mi pawl khat te ama ki-vakna lamah han ciam in pawl khat te minam zong a phawk nawn khalo zong ki om hi. Mi khengkhat te in sep khiatna phat tuamna tampi minam leh gam ading a bawl sangin gam khangto sate lamah mi deihin sem zaw uh hi. Leitung pilna lamah Zomite tampi ki-om khin a, Zomi hihna Identity zong apilna in depin aman suah zong tampi ki-om ta hi. Zomite’ pak ah Pasian nasem khat leh minam a it mahmah ahih theihna khempeuh Pasian leh a mite ading hun pia tawntung Sia Disciple Kap Siam i cih pen thupi ahih manin Pasian nasem taktak ahi hi.

Pasian nasem te in biak inn ah Lai Siangtho bek gen ding cih hi tuan lo hi, na hoih sep pen Pasian adingin ama nasem ahi hi. Zomite pen Pasian bulphuh in na dang khat peuh na hoih sep ding sangin zin kawikawi ding, an lim leh tuilim kipia in kipi bawl ding cih pen adiak in Dictator gamte panin mi tam deuh ahi hi. Gam khangto lamah Pasian nasem taktak te neih leh lam hau loin sem takpi nungzuite bangin inn hoih lo hoih te gal muh lo uh hi. Zomi sungah Pasian nasem tengin hauhan lamah inn hoih lo hoih teng nei-in a tu’te inn sia losia tengah zingan nitak zong ki cing loin akoih ki tam mahmah khin hi.

Zeisu pen summet bawlna leh hauhna bek in a zang mi tampi om a, Zeisu-in mihau pa kiangah na neih khempeuh mi zawngte vapia inla ka nung hong zui-in acih tawh ki leh bulh khin thu ahi hi. Zomi Chin State ah ki tamin leitung gam tuamtuam ah kikhen thangin ki om a, Zogam taktak ading leh Zomi pau leh Zomi lai taktak hong zun ding hong kai khawm ding mipil Sia Kap Sian dan mimal 9 nei leng Zomite IT hun leh AI hunah khangto mahmah Zomite kisuak ding hi. Zomi sungah leitung pilna siamsiam tuamtuam anei lukhu nelkai ngah tampi te in Siapa Kap Sian tung tawnin kizopna neih semsem ding leh Zomi AI ading mi tampi phat tuamna hong bawl khia un cih kong thum uhhi.

Zogam panin Internet 🛜 zong haksa mahmah lai a, gam nuam panin Zomite penta in om te aw, Zogam panin Zomi pau tawh thu tampi ki theih nading hong han ciam un, Burma gamah nuam i cih sam hangin Zogam mual dawn i tenna leh i pupa satsa gam leitangh ah gam nuam a omte pilna hong ngak ung, khuakhua panin mipih taw hong ciah zel unla Computer leh AI thute hong sin pih zel un cih Zomi na laizom te sapna ahi hi.

Biakna lamah zong Pasian ading tu’ cing khat ahih manin ka mite kisapna leh neih ding thupi te ka sep ding ka mawh puak hi ci-in mimal lak zah phialin na sem Sia Disciple Kap Sian in thupha ngah henla khansawt ci dam semsem ta hen! USA gamah nuam sungah sum bawl siam leh sum met nasep siam te in na biakna bek ah na neihsa te min deihna tawh na piak zuahzuah sangin minam ading phat tuamna kipia kim theih nasepna hih Siapa AI ading bang $50000.00 pia lecin Pasian nakpi takin lungdam ding hi. Zomi sungah piak khiatna ahih leh biakna pawlpi bek khawngah ki thahat thei hi, na mipih te phattuamna pen nang phattuamna hi a, na mipih te hong panpihna pen nang lawh cinna zong hi thei hi.

Sia Disciple Kap Sian pen ZPCC sungah Pilna department lamah Director zongin kigen hi, amah sep theih na tampi om ahih manin lungsim siangtho leh cih takna masuan in ni khat in nai3-4 val ih mu man lo phial mipil khat ahi hi. Zomi te in piak khiatna pen biakna bek ah thupi sak kei ni’ Zomi te ading hunleh vai bei zenin nasem Zomi Political Coordination Council ZPCC te ah zong piak theih luat hi. Hun khat ciangin na piakna dik leh dik loin thu hong khen dinga na khaicii tuhna mun ahoih leh na gah pha semsem ding hi. Biakna pawlpi-in zong minam nasem makai te panpih in nung dom siam ni’ Pasian nasep pen kisapna bangin Pasian hong sem ding hi. David te gal aneih ciangin gal simpih a, sep ding na khat peuhpeuh om ciangin tuate khempeuh Pasian kiang panin pai vive thu ahi hi.

Tu’hunah AI in leitung hong luah ding hun hita cih pen mipil siamte muh kholhna leh gen kholhna thu hi a, ni tawp hun bei lamah Lai Siangtho in thuneih mahmah hong piang ding tua kipia ding acih hun tawh kinaih mahmah ta hi. AI hunah Zomite ahun lapin pilna hong pia ding leh hong makaih dingin minam makai te akipan AI nasem te a kipan Topa’n hong ompih ding hi.

(AI hun hita)

http://www.zbc.news

#Correspndent#AI#ZLT#