KUM 78 ZOMI NAM NI FEB 20,2026

Kum 2026 Zomi National Day pawikham khang pen Zomi Nam Ni bawl dan kidemna hun hita kum 2027 ading ngak lah huai ta! Social media panin Zomi Nam Ni bawl dan muh theih dingin mimal man kilakna leh innkuan man kilakna cih bang khang mahmah ahih manin kum dangte sangin tu’ kum Myanmar Zomi State pan kipan khia leitung kizel Zomi te tam penpen ta hi. Kawl gamkap in Zomi Identity hihna hong nialnial mah leh hong nial zawh loh hun hong tung kuan ta hi. Zomi makai te lungtup in zingni suak thak pen Zomi thuneihna Zogamah kiphuh ni ding bek i ngak khawm hi.

Leitung gam tuamtuam Panin Zomi Nam Ni pen thupi tak in a kibawlzia pen a beisa kum te sangin Zomi hihna kitelna Identity taktak hong khang to semsem in minam itna leh gam itna te hong khang mahmah cih pen tu’ kum ZBC correspondent in kan khiatna tawh hong kai khawm in hong suak sak hi. Zomi ki cih ding pen I hihna ahih manin ki neu sek nading om lo hi, Zomi kicih ding leh Zomi hihna na minam nite thupi takin na bawl theihna in nang a ki laam to na hihna hong phawk sak hi. Zomi hihna Identity takpi zumpih leh neusek in na koih leh nang tektek tua din munin a kikoih na hihna hong ki lang sak hi. Zomi/Chin State sungah hihna lo tawh hong kipia Chin min tawh minam ni bawl theih ding bang mah om peuh lo ahi hi.

Na minam hong zuak den pen na hih lohna Chin min ahih manin tua in na ngaihsutna hong khek sak khak loh nadingin na hihna Zomi na dinpih zawh nading kisam hi. Minam khat suah theih nading leh minam lian hihna sungah a ki bual khinsa Zomi kei mah ka hihi ci-in apom pen kum 2026 huam ciangah Zomi te’ sungah minam kibawl tam penpen dingin kimu khia hi. Minam khat a Lawh cin theih nadingin minam makai leh minam galkap a kisap mah bangin Zomi sungah tu’ ni ciangin Zomi Political Coordination Council ZPCC muh theih in om zo pan hi. Hih ZPCC pen abeisa kum sungah minam leh gam itna sungah thu tawh kikal suan zia pai dan Zogam kimakaih nadingin hoih kisakna pen hong khang semsem ahihi.

Zomi Revoluntionary Army Eastern Command ZRAEC pen Zogam galkap in hong din khiat Hunin Deih zahin na sem dingin pawlpi Lian ki tung zo nailo cih pen mipi theihsa a hihi. Kum 2026 ciangin Zogam galkap in 80% ciangah minam galkap din mun a la dingin thupi takin pawlpi lian hong suak khinta cih pen Zomi Nam Ni Cikha panin muh theih in Kiza Khia hi. Zomite buai theihna sungah ZPCC leh ZRAEC kivai puak zia a theilo tampi om a,a thei khengval teng lah kizat theihna sangin hong buai sak kitam thei zaw cih thukiza khia hi. Zomi sungah nam Dangte ki makaihna te thei mahmah uh a, Zomite kivai puakzia theih lak lawhna in makai te hawmthawhna suak sak cih pen kilang khia hi.

ZPCC in a beisa hunin Zogam kallaak kivaipuakzia dingin Thukhun thupi tak bawl khin cih pen mipi-in muhsa leh zaksa thu hi a, hong pai ding hun ah sep dingin maban thupi i sep zawh semsem nading ZPCC/EC kalsuan pih leh lungtup khat ahihna thu gen khia hi. Hun beisa in ZPCC in Thailand gamah Zomi zuum kikoih pen sawt nailo khat in Zangkong khuapi ah Zomi zuumpi kituah sakin ZPCC FA in tua lai panin nasem ta ding cih thu kiza sawn hi. Zogam galkap taktak in a kipia nuam mipeuh mah minam in hong ngak uh a, I gam in a suak tak theih nadingin Zogam galkap hong tel hi. Zomi te I gam leh I minam hong Deih Gawhin I minam hong zuak khemna te panin pilvang ni’ cih pen gam it mahmah te lungtup khat hi.

Zomi Nam Ni kum 2026 pen kum dangte sangin minam lian pawi Khamna thupi leh mun tam penpen ah kibawl ahihna Zomi khempeuh in i phawk ding kisam hi. Gam 45 kiman Zomi te ngeina leh nik leh puan kizep ki thawi dante mimal leh innkuan in ki thawi in man kikap in kizaih zihziah pen hongkhang mahmah thu khat ahi hi. Mipi tawh minam pawi a kham om ding a, mimal leh innkuan in a lem bangin Zomi Nam Ni zat dan a tuamtuam om ding hi. Hih te khempeuh I kaih khawm ciangin Zomite ngeina leh a tuamtuam lahna pen hong sang semsem ahih manin tu’kum sangin kum 2027 pen lian zaw ding cih pen muh kholhna om khin hi. Zomi te minam itna khang mahmah in AI hun tawh ki ton in Zomi te khantohna pen ki lang semsem cih thu ZBC news correspondent kaih khopna panin kimu hi.

Kum 2027 Zomi Nam Ni pen tu’ kum sangin ki demna hong suak ahih manin a gamgam leh amunmun panin minam zia leh tong dan siamna leh tuamtuam ki demna hong suak ahih manin koi mun panin ki bawl dingin Zomi sung hong lok ding cih pen ngak lah huai mahmah ahi hi. Zomi te hong khenkham nuam Chin min peuh leh nek leh dawn ngahna peuh in minam thupi’ na taisan kha kei ni’ Zomi te hong nuai siah nop a tam hangin hong lamto nuam Pasian thahat zaw hi. Tonzang kuamah Pa Thang Suan Mung in zawh thawhna kawlkumpi zia leh tong bangin khangno pilna sin ding khempeuh thuneihna zangin sam khia zel ci hi. Hih gamtatna a pantah Khalkha CNA te tungpan in gahkhia dawi nasep khat ahih mani Tonzang kuamah om Zomi khangno khempeuh pilvang huai ahihna kimu khia hi.

Zomi leh Zogam ading manpha deuh in kibawl thu manpha tampi leh thugil tampi tawh hong bawl khia Zomi Nam Ni Cikha, Zogam leh Lamka khuapi Zogam panin makaite ‘ bawl zia in Zomi thukhung tampi ki gen Khia hi. Mun dang panin kibawl khempeuh pen adiak in Zomi hihna laam to in minam hihna tawisang in Zomi hihna Topa tungah lungdam kohna minam ni thupi-in kibawl kim tek hi. Zomi te ki sap zong a kul nawnlo zahin tu’ kum Zomi Nam Ni kibawl a, tua in khangthak te lungtang tungah hihna Identity kituh khin ta hi.

Happy Zomi Nam Ni
http://www.zbc.news

Correspondent#ZND#CIKHA#LAMKA#2026