Zomi Political Coordination Council
Executive Committee
=======================================

Declaration and Notice of Warning

1. Zogam leh Zomite a’ding in, gam leh leitang (State and Territory), kumpi leh ki-ukna (Governance), thuneihna leh kivaipuakzia (Authority, Rights and Administration System) tawh kisai in, Zomi Political Coordination Council (ZPCC) Pawlpi in, 2019 kum, Zomi Nam Ni hun sung a, Malaysia Gam, Kuala Lumpur khuapi ah akibawl, Leitungbup Zomite Minam Khawmpi (Zomi International Conference) Thukimnate siksan in, Zogam Charter khungzo hi.
2. Ko Zomite in, Zogam Charter siksan in Zogam ka phuh zawhna ding uh ahi zongin, Zogam sung ah Zomite in minam picing khat, tualsuak minam kician khat hihna tawh thuneihna bukim (Self Determination) ka ngahkik zawhna ding uh ahi zongin, Zomi khempeuh kithutuak takin, Zogam zingvai ka hawmkop zawhna dingun, Federal Democracy zia leh tong siksan in, tualsung pan kipan (Bottom-up) in, koma thu komah in avaihawm kahi uhhi.
3. Tua ahih manin, Zogam leh Zomi tawh kisai thute, Zogam sung a galvai savaite, Zogam sung a khua leh tui ki-ukna leh thuneihna vaite, ZPCC/ZRA(EC) Pawlpi theihpihna omlo in, Zogam veng leh paam panin, gamnuaimi thautawi kipawlna khatpeuh hi taleh, gamvai tawh kisai namdang kipawlna khatpeuh hi taleh, gamdang kumpi khatpeuh hi taleh, kuamah peuhmah in, hong saikei un, hong konlawhkei un, hong kitulmawhkei unla, Zogam sung ah, Zomi taangpi taangtate leh ZPCC/ZRA(EC) Pawlpi phalna omlo in hong lutkei un ci in thu ka hong theisak uhhi.
4. Zogam zingvai Zomite bekin ahawm ding ahih manin, thuneihnopna leh nuaisiah nopna tawh, Spring Revolution leh khuapi luah ding paulap in, kuamah hong kithawikei un ci in thu ka hong pia uhhi. Zogam sung ah, ukna buluh galkap kumpi do ding paulap in, Party khatpeuh, namkee khatpeuh a bulphuh a, tualsung ah thuneihna aneinuam Zomi gamnuaimi thautawi kipawlna khatpeuh in, Zogam khuapite luah in, vut leh vai asuah theihna dingin, ahong cial a om aleh, tua bang vaihawmna leh ngongtatnate, Zomi taangpi taangta, khua leh tui in kisang theih peuhmahlo ahih manin, tuabang mite na huhkei unla, tha napiakhakei un. Zogam khuapite vut leh vai asuahna dingin vaihawmna khatpeuh ah, namdang thautawi kipawlna khatpeuh in, panpihna thapiakna napiak uhleh, leitungbup thukhen zumpite ah thu hong kibawl hamtang ding hi cih thu kahong theisak uhhi.
5. Tuaban ah, Zomi ahilo, Zogam tualsuakmi ahilo, gamdang, veng leh paam khatpeuh, namdang kipawlna khatpeuh, gamdang kumpi khatpeuh in, Zogam sung pan hi taleh, Kawlgam sung a muntuam gamtuam khatpeuh pan hi taleh, Vaigam sung a muntuam gamtuam khatpeuh pan hi taleh, a manpha leisung sumpiang khatpeuh, Zogam sung a teng Zomi taangpi taangtate leh ZPCC/ZRA(EC) Pawlpi phalna omlo in, Zogam panin nawnkhia dingin ahi zongin, Zogam sung tawnin nawn dingin ahi zongin, Zogam sung ah kaikhawm dingin ahi zongin vaihawmna khatpeuh a om aleh, kikhaktan ding hi. Hibang vaihawmna leh ngimna tawh, Zogam sung a thautawi kipawlna khatpeuh zawn in tha pia a, lam-etnakhial na piaklohna dingun, thu ka hong pia uhhi.
6. Tuamah bangin, Zogam khuapite in galvai savai leh sumlei sumzuakna ah mun leh mualhoih (Strategic Location) ah hihna hangin, ka khuapite uh luahnopna leh nuaisiahnopna tawh, Spring Revolution paulap in, kuamah hong lutkei un ci in thu ka hong pia uhhi. Zogam khuapite aluah ding leh vut leh vai asuaksak dingin nahong kithawi uhleh, Zomi taangpi taangta in hong kidokik ding a, khang tawntung in gal in hong kiciamteh ding hi. Mundang gamdang, veng leh paam panin Zogam nuaisiah ding, Zogam khuapite aluah dingin ahanciam kipawlna khempeuh, leitung gam tuamtuam ah hong kikhia ding a, leitungbup thukhen zumpite ah thu hong kibawl ding hi cih ka hong theisak uhhi.
7. ZPCC/ZRA(EC) Pawlpi in, Zogam pen Myanmar Gam sung ah akibelpawl Gamkee kician khat ahih manin, Zogam veng leh paam ahi, Minam tuamtuamte leh Gamkee tuamtuamte tawh liangko kikim in, Federal Democracy Gambupi alamkhawm dingin ma pangkhawm ni ci in, kahong zawn uhhi.

Executive Committee
Zomi Political Coordination Council
Tedim, Zogam.